بسهولة اربح ما يقرب من الـ 500 دولار شهرياً !!

• تقدر النهاردة !! بسهولة تكسب ما يقرب من الـ 500 دولار شهرياً أو أكثر من اليوتيوب لو مشيت فى طريق من الطريقين اللى هقولك عليهم فى البوست ده , والبوست ده بناء على تجربتى أنا شخصياً مش مجرد معلومات والسلام , عشان كده لو لسه قلقان بقولك جرب ومش هتندم ...

• مبدأياً : لازم تسجل حساب Google Adsense من خلال اليوتيوب عشان تقدر تستلم عليه فلوسك اللى هتتبعتلك فى الأخر " فى شكل حوالة " على ويسترن يونيون وبتستلمها بالبطاقة ... لو معاك بطاقة يبقى هتقدر تسجل أكونت بإسمك لو ممعكش لسه ممكن تسجل أكونت بإسم أى حد فى عيلتك يكون معاه بطاقة ...

1. هتسجل أكونت على اليوتيوب من هنا 
: www.youtube.com/account
2. بعد ما تسجل حساب هتدخل على Channel Settings
3. وهتدور على كلمة Monetization وهتدوس عليها
4. هيطلب منك إنك تربط حساب أدسنس بتاعك لو معندكش
5. هتسجل حساب جديد من خلال Sign up
6. معلومات التسجيل بتاعتك كلها لازم تبقى صحيحة وبالإنجليزى

• بعد كده الحساب بيتفعل فى خلال 24 ساعة وبيبقى عندك حساب أدسنس مربوط بقناتك على اليوتيوب اللى منها هتقدر تكسب فلوس وتستلمها من خلال جوجل أدسنس

==================================
• عشان تكسب من اليوتيوب فى طريقين إختار الأنسب ليك
==================================

الطريق الأولى : هو إنك تنزل تشترى كارت ساتلايت , بتتراوح أسعار كروت الستلايت ما بين 150 جنية لحد 1000 جنية , تقدر تشترى حاجة فى حدود 250 جنية وبنصحك بكارت سعره وإمكانياته كويسه إسمه Axtrom , لو مبتفهمش فى الهاردوير خد معاك الـ Case عشان صاحب المحل يركبهولك ...

بعد كده هتوصل سلك الدش فى الكارت اللى متركب فى الكيسة بتاعتك من ورا , طبعاً الكارت بيبقى معاه ريموت صغير كده وإسطوانة بتسطبها وبتنزل القنوات عليه وبيبقى عندك قنوات الدش كلها على الكومبيوتر , وبيتيحلك البرنامج بتاع الكارت إنك تسجل أى حاجة من أى قناة فى أى وقت بمنتهى السهولة ...

• مطلوب منك إيه عشان تكسب من كارت ساتلايت ؟

1. يفضل إنك تشترك فى الـ Sharing اللى بيفتح القنوات المشفرة
2. تابع وسجل أى حاجة بتهم الناس فى الوقت الحالى
3. السياسة , الرياضة , برامج المقالب , المسلسلات إلخ ...
4. لازم تبقى متابع وعارف الناس بتدور على ايه
5. اللى هتسجله هتعمله ( مونتاج ) بسيط على جهازك

- هتحمل برنامج إسمه PowerDirector 11 ده برنامج متخصص فى تعديل ومونتاج الفيديوهات , طبعاً فى برامج تانية كثير لكن ده أسهلهم المطلوب منك كالأتى :-

1. إنك تخفى أى لوجو قناة من خلال إنك تحط عليه صورة أو تلعب فى طول وعرض الشاشة لحد ما يختفى والأفضل إنك تحط عليه صورة ما تخفيه بيها ...

2. تقطع اللقطات المهمة بس من اللى إنت سجلته , الناس على اليوتيوب مش هتتفرج على فيديو 20 دقيقة عشان لقطة 30 ثانية , إختصر عشان الأبلود كمان مياخدش منك وقت طويل

3. إكتب عناوين الفيديوهات بتاعتك بشكل يشد اللى هيتفرج , فى كلمات معينة كده بتغرى الناس عشان يفتحوا الفيديو زى : مفاجأة , لأول مرة , حصرياً , شاهد قبل الحذف , لم يعرض من قبل وهكذا ...

4. نصيحة بسيطة ودى بتفرق فى SEO الفيديوهات على اليوتيوب , إرفع الفيديو بتاعك بجودة HD لأن الفيديوهات اللى جودتها أعلى بيبقى ليها أفضلية على الفيديوهات اللى جودتها ضعيفة ... إتعب شوية فى الأبلود لكن عشان تاخد مقابل ده فلوس ...

5. لو حبيت تضيف موسيقى أو أغنية لأى فيديو متجيبش من أى حتة وخلاص عشان حقوق الملكية على اليوتيوب ممكن تمنع فيديو إنه يعرض إعلانات وبالتالى مش هيدخلك أى ارباح منه لو عايز تضيف موسيقى إستخدم الموسيقى الموجودة هنا : https://www.youtube.com/audiolibrary

- بالنسبة للرياضة ( الشيرنج ) أو السيرفر اللى بيفتح القنوات المشفرة طبعاً مش هيفتح Bein Sports لكن هيفتح سكاى سبورتس وقنوات تانية كثير على الهوت بيرد ودى اللى تقدر تسجل منها كل الماطشات والأهداف وهكذا ... إلا طبعاً لو عندك ريسيفر BeIN Sports وده هيبقى أفضل بكثير ...

• لو مشيت على الطريقة دى بشكل يومى تنزل فيديو أو إثنين فيهم حاجة تهم الناس , هيدخلك فى الشهر مبلغ ميقلش عن 300 دولار وممكن يزيد على حسب نوع الفيديوهات وإنتشارها ... وده عن تجربة شخصية

===================================

الطريقة الثانية : المونتاج والإخراج ... السوق المستهدف من الطريقة دى هو السوق الأجنبى , الطريقة دى ربحها ممكن يوصل لـ 1000 دولار فى الشهر وأكثر لو عندك الخبرة والقدرة على تنفيذها بشكل إحترافى ...

• مطلوب منك إيه عشان تكسب من المونتاج والإخراج ؟

1. تتعلم الأول المونتاج والـ Video Editing بشكل إحترافى
2. إتعلم من خلال الدليل ده : http://goo.gl/PnjRhd
3. هتحتاج تشتغل ببرامج Sony Vegas Pro أو Adobe premiere
4. هتحتاج إنك تعمل قناة باللغة الإنجليزية
5. لازم تحدد مجال بتحبه ويكون ليه جمهور كبير
6. غير مكان حسابك على اليوتيوب لأمريكا أو بريطانيا

أكثر المجالات ربحاً فى السوق الأجنبى هى :-

1. Fun & Bizarre
2. Technology
3. Motivation
4. Sports
5. Music Lyrics
6. News & Politics

كل المطلوب منك هو إنك تشوف الفيديوهات اللى فى المجال اللى انت اخترته , وتبتدى تحاول تطلع حاجة قريبة من الشكل ده , أهم حاجة فى المجال ده هو الـ SEO الخاص بالفيديوهات عشان تقدر تطلعها فى النتائج الأولى داخل اليوتيوب ...

شوف وطبق اللى فى الموضوع ده : http://goo.gl/hM0xej

أهم حاجة لازم تعرفها فى المجال ده إنك لازم تراعى عامل الـ Continuity أو الإستمرارية , أول فيديو مش هيجيب مشاهدات كثير ولا أرباح كثير , لكن لو القناة بتاعتك فى خلال شهر بقى فيها 5 فيديوهات , الفيديو رقم 6 هيدخلك ربح كويس جداً , لأن القناة هتبتدى تقوى ويبقى فى كونيكشن ما بين الفيديوهات بتاعتك ...

• نصيحة بسيطة :- قبل ما ترفع الفيديو على قناتك , إرفعه على أى قناة تانية تابعة ليك وشوف هل في أى حقوق ملكية داخل الفيديو تمنع عرض الإعلانات ولا لا , لو مفيش يبقى خير وبركه إمسحه من على القناة دى وإرفعه على قناتك الأصلية , لو فيه أى مشاكل هتلاقى اليوتيوب بيقولك عليها تحديداً , تقدر تعدلها وتتخلص منها وترفعه بعد كده على قناتك الأصلية ... ده عشان مترفعش فيديو ويتمنع عرض إعلاناته على قناتك ومتقدرش تعدل عليه بعد كده ...

==================================

بس كده خلص الموضوع ... هو ممكن يبان صعب شوية من برة , لكن صدقنى هو أسهل مما تتخيل , ولو بقى هو شغلك الشاغل هيبقى مصدر ربح قوى جداً وده عن تجربة شخصية

البوست ده خد منى وقت طويل جداً , مش هياخد منك ثوانى تعمل شير يمكن واحد من صحابك يلاقى فى الطرق دى ضالته ...

المصدر:‏‏‎Ahmed Ezat‎